Koronavirus pandemiyası səbəbindən 2020-ci il bütün dünyada olduğu kimi Azərbaycanda bir çox biznes sahələri üçün çətin dövr kimi yadda qaldı.  

Çətinliklərə baxmayaraq İnvest-AZ İnvestisiya Şirkəti ötən, 2020-ci ili uğurla başa vuran şirkətlərdəndir. Belə ki, 2020-ci ilin sonuna şirkətin bölüşdürülməmiş mənfəəti 1,8 milyon manata çataraq fəaliyyət dövrü ərzində «İnvest-AZ»ın ən yüksək göstəricilərdən biri olub.  Bu, həmçinin sektor üzrə də ən yüksək göstəricilərdən biridir. 2020-ci ilin nəticələrinə əsasən şirkətin mənfəətinin aktivlərə (ROA) və məcmu kapitala (ROE) nisbətləri müvafiq olaraq 24% və 75% təşkil edib. Ümumilikdə, əvvəlki ilin müvafiq göstəriciləri ilə müqayisədə şirkətin gəlirləri 6,82% artıb, xərclərə isə optimallaşdırılma sayəsində 7% qənaət edilib. 

İnvest-AZ İnvestisiya Şirkəti 2020-ci ildə bəzi daxili fəaliyyət proseslərində də yeniliklər həyata keçirib. Şirkətdə struktur dəyişiklikləri baş verib, yeni Müşahidə şurası və Audit komitəsi təsis edilib. 

Bir sıra mövcud layihə və alətlər təkmilləşdirilib.  Belə ki, tətbiq edilən texnoloji yeniliklər nəticəsində istifadəçilər üçün hesabın açılması prosesi daha rahat hala gətirilib. İnvest-AZ İnvestisiya Şirkətində ilk dəfə olaraq ASAN İMZA vasitəsilə onlayn şəkildə ticarət hesabı açmaq artıq mümkündür. Bununla yanaşı, pandemiya dövrünün tələbləri və müasir tələbatlar nəzərə alınaraq Maliyyə Məsləhəti xidmətləri tamamilə telekonfrans şəkildə həyata keçirilib. Həmçinin, mövcud vəziyyətə uyğun olaraq Tədris və Maliyyə savadlılığının artırılması prosesi də tam olaraq onlayn təlim formasında həyata keçirilib. Ötən il ərzində «İnvest-AZ»ın 50-dən artıq ödənişsiz təlim vebinarları ilə ümumilikdə 1000 nəfərə yaxın vətəndaşımızı maliyyə bazarları ilə bağlı maarifləndirilib. Həmçinin, bu sahəyə maraq göstərənlərin daha da peşəkar olmaqları üçün təlimlərə cəlb edilib. 

Ötən ilin iqtisadi böhran və sosial çətinliklərlə keçməsinə baxmayaraq, 2020-ci il ölkəmiz üçün özəl və arzu olunan bir il oldu. Azərbaycan Ordusu düşmən üzərində tarixə yazılacaq qələbə qazanaraq Qarabağı azad etdi. Bu hadisənin müsbət təsiri 2021-ci ilin ilk aylarından özünü göstərməyə başlayıb. Belə ki, artıq bu ilin ilk ayında əməliyyat həcmlərinin artımı müşahidə edilir. Bu müsbət artım tendensiyasına il ərzində sadiq qalacağına əminlik hissi ilə İnvest-AZ şirkəti, daha perspektivli layihələr və planlar üzərində işləyir.