İPO olunan şirkətin səhmlərini birjada istənilən fiziki və hüquqi şəxslər, o cümlədən yerli və xarici investorlar ala bilər. Bu da, kapitalın bir mənbədən asılılığının azalmasına, effektiv diversifikasiya olunmasına səbəb olur.

İPO olunan şirkətin səhmləri birjada asanlıqla alınıb satılır. Bu da şirkətin real bazar dəyərinin formalaşmasına, öz növbəsində investorların şirkətə marağının artmasına və daha çox kapital cəlb olunmasına şərait yaradır.

Uğurlu İPO, şirkətin maliyyə bazarlarına birbaşa çıxışını təmin edir, gələcəkdə də əlavə emissiyanı həyata keçirilməklə əlavə kapitalın cəlb olunmasını asanlaşdırır. Bundan başqa, xalq şirkəti olmaqla şirkət daha əlverişli şərtlərlə borclana bilir.

Şirkətin səhmlərinin birjada yüksək dəyərləndirilməsi, eyni zamanda, səhmlərdən mükafatlandırma vasitəsi kimi istifadə olunması daha təcrübəli və uğurlu işçilərin şirkətə cəlb olunmasına və ya mövcud personalın yüksək motivasiya ilə çalışmasına səbəb olur. Bu da öz növbəsində effektivliyin və məhsuldarlığın, həmçinin gəlirlərin və səhmlərin qiymətinin artmasına səbəb olur.

İPO-dan sonra şirkət kommersiya və maliyyə ictimaiyyəti tərəfindən tanınır, bu da öz növbəsində, şirkətin beynəlxalq imicinin formalaşmasına səbəb olur. Yüksək imic şirkətin müştəriləri və təchizatçıları ilə uzun müddətli əlaqələrin yaranmasına, qlobal bazarlara doğru genişlənməsinə, şirkət markasının populyarlığına və satış həcminin dəfələrlə artmasına gətirib çıxarır.

İPO olunan şirkətə mediada böyük marağın yaranması müştəri bazasının genişlənməsinə, məhsul və xidmətlərin geniş kütlə arasında tanınmasına səbəb olur. Eyni zamanda, dövrü olaraq maliyyə hesabatlarının mediada açıqlanması investorların şirkətə olan marağının artmasına gətirib çıxarır.